Thursday, July 26, 2007

الاخ ابو الغيط بيهبب ايه في اسرائيل

النهاردة فاتحة عنية و لسة بقول يا فتاح يا عليم

لاقيت الخبر اللي يحرق الدم على الجزيرة .. وزير خارجية مصر في اسرائيل

وايه ..؟ مش في تل أبيب ...

في القدس .. الحمد لله .. على اعتبار انهم اعلنوها عاصمة الكيان الصهيوني و لا ايه بالظبط

طيب بيعمل ايه ؟ .. يحمل مبادرة سلام عربية جديدة ، يمد بها يد السلام لإسرائيل .. اصلهم قطعوها

بدأها مبارك .. في حفل تأبين احساق رابين بعد اغتياله في التسعينات

كان ذلك اول تاريخ لظهور النخبة الحاكمة العربية في الاراضي الفلسطينية المحتلة

وأين ؟ .. في القدس وليس في أي مكان آخر

لي ذراع من الإسرائيليين .. لأنهم يعلمون أننا تحت أحذيتهم و سنوافق وبكل رحابة صدر

الدول الأوروبية رفضت ذلك .. و نحن من قبلها .. لأننا و بكل بساطة

لا نعترف بأي ثمن لدماء شبابنا التي سالت أنهارا و مازالت لتحرير شبر واحد

من تلك المدينة المقدسة التي أراها أمام عيني و مسجدها يبكيان و هما ساخطين علينا

لن يقبلنا القدس .. سيرفضنا للأبد .. تخلينا عن كل مبادئنا

وليس الحكام هم المخطئون دائما .. نحن شعب رخيص الروح و الدم

متى سنثور و نجمع أشلاءنا التي تناثرت أمامي في كل مكان من العالم .. لا بل الكون

قد يكون ذهابنا حلا لأزمات عديدة .. لكنه من المفترض ان يحل شيئا

لا أن يزيد من الام تلك المدينة .. لا ان يشعرهم بالمزيد من الفخر و الغرور

و المزيد من تعميق خيبتنا التقيلة ... لماذا الزيارة الان

اليوم .. و خلال زيارة ابو الغيط .. استشهد 6 فلسطينين برصاص الاحتلال الصهيوني

و هناك المزيد .. ولا أرى أي مبرر سوى كونداليزا رايس التي زارت المنطقة مؤخرا

و ممثل الرباعية الدولية توني بوش - بلير سابقا - إليها

مازلنا نقدم الكثير و الكثير من التنازلات و مازلنا و سنزال لا أعرف لأي وقت سنبقى

لنقدم التنازلات و الخضوع لما تريده الولايات المتحدة .. حتى أصبحنا دمية بلا هوية

Friday, July 20, 2007

عاجل : اقتحام غرفة الصحفية البريطانية ايفون ريدلى بالقاهرة



خدمة ايجبت برس
قامت قوات المصرية باقتحام غرفة الصحفية البريطانية ايفون ريدلى بمقر أقامتها بفندق سميراميس بالقاهرة وتم العبث بمحتويات الغرفة وأخذ بعض الأوراق الهامة المتعلقة بتقارير صحفية حول رحلتها للقاهرة ومشاركتها فى بعض الفعاليات المتضامنة مع قيادات وكوادر الإخوان المسلمون المحالون للمحاكمة العسكرية.

والجدير بالذكر أن قوات امن المطار أخبرت ايفون ريدلى لدى وصولها لمطار القاهرة مساء الجمعة الماضية باختفاء حقيبتها الرئيسية وادعت سلطات مطار القاهرة أن الحقيبة تم اختفاؤها فى مطار لندن، ولكن تم الكشف عن وجود حقيبة ايفون بعد وصولها بيومين وتم اكتشاف أنه تم فتح الحقيبة وأخذ بعض الأوراق الهامة والمتعلقة بحالة حقوق الإنسان فى مصر.

وأكدت ايفون فى تصريح لايجبت برس انها سوف تتخذ كافة الإجراءات القانونية تجاه من قام بمثل هذه الأفعال التى تشوه صورة مصر.

والجدير بالذكر أن ايفون ريدلى كانت مشاركة فى وفد حقوقى دولى للتضامن مع قيادات وكوادر الاخوان المحالون للمحاكمة العسكرية وكان من بين هذا الوفد وزير العدل الامريكى السابق رمسى كلارك وسميح خريس عضو منظمة العفو الدولية وايفان لورلنس المستشار القانونى لملكة بريطانيا وتم منع الوفد الحقوقى الدولى من حضور جلسات المحكمة العسكرية لقيادات الاخوان.

كما تم منع المحامى البريطانى الشهير على أظهر من دخول مصر وتم ترحيله مرة أخرى الى لندن بعد احتجازة عدة ساعات فى مطار القاهرة الدولى

نقول اية غير ان ده عته وشغل عيال ميعملهوش عمو المخبر ابو سنب مبروم وخارم الجرنال وواقف تحت البيت يعني مصرين وقلنا ماشي كمان اجانب لكن حريم ده قلة ادب
منقووووووووووووول

في ميدان التحرير

القاهرة الجميلة .. للي بيحبوها
رحت أقابل واحدة صديقتي اسمها ريهام أدام هارديز في ميدان التحرير
بعد ما سلمت عليها و مشينا شوية خطوتين و بنقول يا هادي
يارب نلاقيلنا شغلانة نشتغلها بدل حالة الفراغ اللي احن عايشينها
بالمناسبة ريهام دي بنت بميت راجل
عضو اتحاد طلبة عندنا في الكلية
و كمان بتشتغل مساعد مخرج في ماسبيرو
بس تقريبا اللي بيجمعنا علطول حالة عارمة من
الاكتئاب الناتج عن الفراغ القاتل
المهم أول ما مشينا لاحظت انه فيه اتنين راجل و واحدة ست مراقبينا
بقولها يا ريري فيه اتنين مركزين معانا جامد
بتقولي فين فين..؟ قلتها جنينا علطول اهو .. بصت شوية
قالتلي : سارة هو فيه ايه مالهم دول ..؟

أنا قلت : معرفش
المهم .. و إحنا ماشيين وقفتنا الست فعلا
و قالت ايه ..؟ يا آنسة – ريهام – الراجل اللي هناك دة عايز
يخطبك ..!!!!! احنا الاتنين تنحنا أحلى تتنيحة صعايدة عملناها في حياتنا
بنبص على الراجل اللي عايز يخطب ريهام لاقينا راس طالعة من كابينة ميناتل اللي في الميدان
جراج مبتسم على الاخرررر
أنا كنت هامووووت من الضحك على الموقف
المهم ريهام بصت شوية و ياعيني كان هايجيلها أزمة قلبية

قالتها : .. سوري .. مش هاينفع
أنا مشيت كنت هاموت من الضحك الهستيري طول السكة
و ميدان التحرير كله اتفرج علينا
ردها كان غير متوقع بصراحة

Tuesday, July 17, 2007

رحلة اسكندرية


لما حسيت بقرب نهاية حاجات كتير في حياتي سواء الشغل أو حتى على المستوى الشخصي
او بمعنى تاني حسيت بقرب نهاية الحياة


اخذت اجازة و سافرت لوحدي إلى احلى مكان في العالم ، سافرت اسكندرية


اول يومين حسيت بملل شديد لدرجة اني فكرت في ارجع للقاهرة
بس بالصدفة لاقيت ناس يستاهلوا فعلا اني الواحد يقعد معاهم و مكان هادي و جميل
و بحر كبيييييير يساع كل همومي و كمان فرحي و دموعي حسيت اني
المكان هناك احتواني بجد
بكل اللي فيه الوحش و الحلو
الوطن مش بس بالناس اللي عايشين فيه
الوطن باحساسك و انت جواه


علشان كدة تقريبا خدت على اسكندرية علطول و حفظت شوارعها
و يمكن حواريها و حبيتالمشي على بحرها الجميل بالليل و الصبح و المشي الكثير
بيعلم خصوصا لما تمشي من مكتبة اسكندرية لحد المنتزه
على صوت الموج اللي كان بيييجي لحد رجلي و يهبد المية المالحة على الصخرة
اللي انا واقفة عليها
على قد ماهو قوي و كبيييير و عنده استعداد يبلعنا كلنا جواه
على قد ماهو حنين و قادر انه يستوعب كل هموم البشر اللي بتشتكيله
كل لحظة على شط اسكندرية


حبيت المكان هناك اوووي ، تقريبا بتكلم عنها و عن الناس اللي قابلتهم هناك كل يوم من ساعة ما رجعت


بتمنى اعيش هناك علطول ، ولو لاقيت فرصة اني اشتغل في اسكندرية
هاروح اقعد هناك علطول


و مش هسأل في القاهرة اللي تجيب اكتئاب دي تاني


بجد اول ما رجعت و فتحت شباك الميكروباص حسيت اني هاموت
من الجو المعفن و اول ما بصيت في وجوه الناس


افتكرت كل اللي كان مخليني محبطة و مكتئبة و قرفانة من حياتي


القاهرة فيها زحمة كبيرة جدا مش بس ناس كثير مشاغل كثير خلت
الاخوات ميسألوش على بعض
و على قد ما انا بحبها على قد ما خلاص حاسة انها هاتنفجر من الناس
و الهموم اللي عششت جواهم و خنقتهم
و مواكب الوزراء اللي بتوقف حال البلد كلها و مقرات الحزب الوطني
اللي متكلفة ملايين
و صور الريس اللي في كل مكان كأنه بيقولنا انا شايفكم
و معاكم في كل مكان

كنت حالفة خلال الاجازة دي اني مش هاشتغل هناك واني هاقضي
اجازة و فعلا دة حصلت

بس ضاعت علية صور جامدة موووت

مش مشكلة ، انا مبسوطة و الحمد لله كانوا اجمل ايام في حياتي


هو دة بقى اللي كان مخليني مش عارفة اكتب حاجة في المدونة





Tuesday, July 3, 2007

عزاء واجب

نأسف لهذا الازعاج
عزاء واجب
توفيت إلى رحمة الله صفحة هوتلاين - شباب المصري اليوم - و سيتم نقل الجثمان من أمام
اوضة المدعو مجدي الجلاد
و الدعوة مش عامة
محدش يعيط يا جماعة بس الاعلان اللي فات تقريبا قضى على الصفحة
ههههههههههه
الصفحة اتلغت من الجورنال و حولونا علشان نعمل المشروع الجديد المسمى ملاحق المصري اليوم
ما علينا
تقبل الله سعيكم