Friday, August 31, 2007

انا افكر اذا انا موجودة

اليومين اللي فاتوا تقريبا كنت واقعة في ستين مصيبة و كالعادة خدت نفسي و هربت بس المرة دي الهروب بعد و طول و تعبني اوووووي رحت الأقصرمن اسبوعين فاتوا و زرت معبد الكرنك و شفت معبد الاقصر و دخلت مقبرة رمسيس التاسع و الخامس و مرمبتاح و كمان مقبرة حبيب قلبي توت عنخ أمون و رحت بقى عند عمتنا حتشبسوت يعني لفيت لف في الحر اللي احنا فيه دة انما ايه ، المهم الرحلة دي اصلا ركبتلها قطر الصعيد قعد في السكة 13 ساعة بالتمام و الكمال و طبعا هاتقولولي خدت كام يوم ، انا بقى جيت في يومها جيت اركب القطر لاقيت اول حجز ان شاء الله 2 سبتمبر المهم قلت علينا و على السوبر جيت ركبت السوبر جيت الساعة 7 بالليل وصلنا عن طريق رأس الرجاء الصالح إلى القاهرة بعون الكريم الساعة 12 الضهر طبعا تخلل الرحلة عطل الأتوبيس 3 مرات يعني كنا بندوب اتوبيس كل ساعتين .. ما علينا .. وصلت الحمدلله القاهرة بسلام و اول يوم في القاهرة بالليل لاقيت واحد صاحبنا بيقولي هتسافري رفح .. أهلاااااا انا كنت مستنية سفرية رفح دي بفارغ الصبر رحت رفح تبع لجنة الاغاثة و الطوارئ التابعة لاتحاد الأطباء العرب ، الرحلة دي أول رحلة اشوف فيها اخر حدود مصر البرية غير اسكندرية طبعا رحنا العريش و رفح المصرية و شفت معبر رفح و قابلت فلسطينيين من العريش و كانت رحلة جامدة جدا .. المهم ، بعدها بيومين اتنين فقط كنت في اسكندرية ، تاني ، مقضياها سفريات ، كنت مخنوقة جدا و انا لما ابقى مخنوقة عمري ماهاقول اني تعبانة اول مخنوقة بالعكس ببقى للناس اللي ملهاش دعوة بأي حاجة خنقاني عادية خالص و بهذر و بلعب و كل حاجة .. المهم طبعا رحت اتمشيت على البحر و قعدت على ستانلي طبعا .. المهم من الاخرانا تعبانة اووووووووووووي لدرجة اني مش قادرة افكر في اي حاجة في الدنيا علشان كدة حاسة اني مش موجودة مع البشر في الدنيا دي ، انا حاسة اني وقعت من أعلى دور في برج القاهرة و مع ذلك مش ميتة بتألم من كل حاجة و المشكلة اني بجد مش قادرة اصرخ بصوت عالي ..
كل حاجة جوايا ومحدش يسألني مالك
المهم ... محدش ياخد في باله .. هنعدي و اهي ماشية


Thursday, August 23, 2007

بيقولوا على شرقاوي .. اتنصر

رئيس تحرير الجمهورية .. تحفة جدا نشر خبر بيقول ان محمد الشرقاوي
اتنصر .. بقى مسيحي
دة بقى الحكاية الجديدة اللي الصحف القومية هاتمسك فيها
انا بصراحة اضطريت اني انقل تدوينة شرقاوي على لسانه قبل ما اكون في طريقي
لرفح المصرية أو معبر رفح على الحدود
...................
فجاه محمد الشرقاوى بقى من ضمن أهتمامات صحفى تبع الكتيبة الامنية اللى شغلتها مهاجمة شباب قوى التغيير..طبعاً الكتيبة الامنية بتختلق وقائع ..وبتكذب زيها زى النظام كله ورموزه…بس فجاه بقى فيه موضوع ..بسبب حته البتاع إللى اسمه محمد حجازى وبصراحه مكنتش عاوز اتكلم عن الموضوع ده..بس عموماً هو حر يتنصر يكفر يبقى بوذى يرجع مسلم ..هو حر لأن ده بيمسه هو بس ..ومش بيمس اى حد تانى ..حتى لو هو قال انه المنسق العام لحركة كفايه..كل واحد فى الحركة بيعبر عن شخصه..حتى عبد الحليم قنديل اللى بيطلع قرارات بتاعته هو وباسم الحركة بيعبر بس عن نفسه..كفايه فكره مش أفراد..وربنا قال من شاء فليؤمن ومن شاء فليكفر..حريته الشخصية بتكفله حق الاعتقاد والتفكير فيما يحلو له..على أى حال ده مش موضوعنا برضه..فجاه بقى محمد على ابراهيم الصحفى اللى مسكوه رئيس تحرير جريدة الجمهورية مكان سمير رجب أفتكر أنه لازم يسدد ديونه ويرد الجميل للى عينوه فبدأ يهاجم حركة كفاية..وبيلوش..وتحت خبر نزل فى الصفحه الاولى يوم الاثنين بعنوان :هانى عنان واسحق يزورون والد حجازى.. قال فيه انى اتنصرت..فجأه ننوس عين أمه أكتشف لوحده وقرر بذكاءه الألمعى انى اتنصرت..طيب مش لما هقرر قرار زى ده مش كنت هقولك برضه وأهو أضمن حملة تهليل .. جتك البلاوى..المهم بالنسبة لى انك كداب واذا معتذرتش فانا هرفع عليك قضية وهنشوف..انا اتعذبت وفضلت مسجون 3 شهور ونمت فى الشوارع متضامن مع القضاه وانت كنت بتكتب متضامن مع شلة البلطجية..وانت مش جديد عليك ولا على اللى سبقوك انهم اشتغلوا مخبرين لظباط أمن الدولة ..انا بقى يا حيلة ماما اسمى محمد الشرقاوى..لسه محمد الشرقاوى..ومع حرية الانسان فى أختيار ما يشاء وقتما يشاء

Monday, August 20, 2007

الحقوا .. الرسالة دي وصلتني من صديق

مهم جداً جداً
هذه الحادثة حصلت في باريس ، وقد تحصل في أي
وقت وأي مكان آخر
قبل بضعة أسابيع وبالتحديد في السينما في باريس
أحست إحدى الفتيات بوخز في المقعد
وعندما قامت ، وجدت إبرة مغروزة
في المقعد، ملصق بها ورقة مكتوب عليها
لقد حقنت بفيروس الإيدز
مركز الحماية من الأمراض أو السيطرة على الأمراض
أبلغ عن وقوع هذه الحادثة في مدن أخرى غير باريس
وبعد فحص الإبر وجد أنها حاملة فعلا لفيروس الإيدز
كما أنها حصلت في لبنان
كما أبلغ المركز بأن هذا النوع من الإبر
وجد في الصراف الآلي
ونطالب من الجميع توخي الحذر عند مواجهة
مثل هذه المواقف
يجب التمعن والتدقيق في المقاعد قبل الجلوس عليها
مؤخراً، صرح دكتور في الهند، حيث أن هذه الحادثة
حصلت لإحدى مرضاه أيضاً في السينما بنيودلهي
كانت فتاه مخطوبة، على وشك الزواج وجدت
الإبرة بعد أن وخزتها وقد كان ملصق بها ورقة مكتوب عليها
أهلا بك في عالم الإيدز
الدكتور أخبر عائلتها بأن مفعول الفيروس لن يبدأ إلا بعد 6 أشهر
وعادةً المصاب يعيش مابين 5 إلى 6 سنوات
ولكن الفتاة توفيت بعد 4 أشهر
يجب جميعاً أن نتوخى الحذر
الرسالة دي وصلتني من صديقة صاحبة مدونة انسانة و لا تعليق

Saturday, August 11, 2007

رجالة الزمان دة .. بواقي حرب .. مع كامل الاحترام


منى صديقة عمري

مش لاقية زيها بجد ، لو لفيت الدنيا يا منى مش هلاقي زيك

عرفتها السنة اللي فاتت في الاجازة مع اننا في نفس الكلية ونفس الفرقة

عرفتها من الجورنال .. المصري اليوم

عمري ماجربت اكلمها في الكلية .. ربطتنا علاقة قوية جدا بسبب الصحافة و قلبت بصحوبية جامدة جدا

لان قلبها بجد ابيض اووي مع انها فاهمة اللي حواليها كويس اووي

عينيها تديلك احساس بالذكااااء الخاااارق و احيانا اللؤم

لانها اول ما بتكلمك بتكون عايزة تفهمك بأي طريقة

بحبك يا منمونة اووووي

الناس بتستغرب جدا لما تلاقينا مع بعض علطول

لان منى مسيحية ، ازاي بقى نكون اكتر من الاخوات

في الاول و في الاخر احنا مصريين و هدفنا واحد

نفسنا البلد دي تقوم و تتنفس هوا زي الاول

بدل الزبالة اللي بتنفسها المصريين دلوقتي

نفسنا البلد دي تتحرر

لما بنتلم انا و هي في مكان واحد

الناس صحابنا بيخافوا مننا اووي

بيقولوا اننا اكيد بنجهز لمصيبة

......


منى ليها عبارة مشهورة جدا

"الرجالة راحت في الحرب"

انا معاها في كل كلمة

الرجالة اللي هم الرجالة فعلا راحوا في الحرب و اللي موجودين دول بواقي التصدير

مع كل احترامي للقراء

فيه منهم مش نافع يبقى راجل فبنقول عليه راجل مجازا

بالاسم يعني و فيه منهم ينفع يتقال عليهم رجالة ، بس نص نص

يعني مثلا في الجامعة

مثلا يعني

نادرا اما بقول على العيال اللي عندنا رجالة ، اوي مش بقول اساسا

احنا مسمينهم عيال ، وخلاص من غير تحديد لنوع الجنس

كل همهم انهم يقعدوا يهذروا و يقولوا نكت سخيفة جدا

و يلموا شلة كبيرة تلات اربعها بنات

و يقعدوا يلعبوا و في اخر السنة ياخدوا المحاضرات و الورق من البنات

و يطلعوا رحلات دريم بارك و اسكندرية بحر بس

لكن لو طلعت المكتبة مثلا يقولوا لأ مش عايزين

و غالبا هم المسئولين عن الهرج و المرج اللي بيحصل في الرحلات دي

و في الشارع تلاقي الراجل - اللي في حكم المجتمع راجل - بيتخانق على كرسي مع

واحدة ست كبيرة علشان يقعد و هي تقف

سبحان الله ، هتقولولي المساواة ، والله هارد اقول اللي طالب بالمساواة دي هو اللي يرد

وبما ان سوزان مبارك مش هترد على امثالكم يبقى خلينا في القيم و الأخلاق اللي تربينا عليها

وبعدين بجد بقى اتفاقيات حقوق المرأة دي بقت سبب رئيسي للتفرقة العنصرية ضدها

ما علينا الموضوع دة كبييييييير اووي علشان تناقشه واحدة زيي لا تعترف بما يسمى حقوق المرأة

اللي مطول شعره بقى و اللي ماشي بيترنح و اللي فرحان بأنه مأنتم مع بنت و لا اتنين أو عشرة

و لا على رأي عادل امام منتن مع ستين واحدة ، و اللي الصبح في الشغل

و طالعان عينه و بالليل في أي ملهى ليلي ، هو ليه مصطلح تاني

بس انا مبحبش اقوله ، يعني مراعاة لأن دي مدونة وطنية حبتين

واللي مربي عضلات و واخدها عافية و خناق

وعايشين حياتهم على الاخر ان صح اننا نقول على دي حياة يعني


و علشان ما اظلمش حد فيه رجالة بجد

بس المشكلة ان الرجالة بجد دول دماغهم مقفلة

يعني حلينا مشكلة ، لاقينا راجل بس من غير تفكير

يعني مفيش واحدة ست تشتغل في مجتمع فيه رجالة

و مفيش بنات يطلعوا رحلات و لا معسكرات و لا يباتوا برة البيت

مع ان المعسكرات دي تبع جهات تقدر تثق فيها ، زي الكلية او الجامعة مثلا

و ازاي البنت تقعد في الشغل لحد وقت متأخر ، كأنها مثلا قاعدة في بيت واحد صاحبهم

و لو اتجوز واحد من الرجالة دول يبقى مراته متخرجش و ما تروحش و متشتغلش مع رجالة

.....

سؤال وجيه بقى بعد دة كله

يعني ايه راجل ..؟ يعني ايه رجولة

علشان انا مبقتش حاسة ان الزمن دة في رجالة

و الواحد احتار ما بين مستقبله العملي و بين انه يتجوز و يعيش حياة تقليدية جدا

اخرتها الخنقة و القرف في البيت بس بدون تنويع في القرف

قرف الشغل مثلا ، قرف مشاكل مصر

و قصر ذلك على قرف البيت و العيال و راجل البيت

.... اذا حق لي السؤال ممكن أسأل رجالتنا ..

انتو بتفكروا ازاي


Tuesday, August 7, 2007

....انا جيت

البلد دي رايحة على فين انا جيت في مرة اعد الكوارث اللي البلد دي فيها لاقيتها كتيييثر اوووي
القمح خلص و العيش غلي و الاسعار نار
الناس مش لاقية تاكل و حاليا مش لاقية تشرب
وزير العدل طايح في القضاة
سعادة الوزير المحترم المغربي بيقول مصر مفيهاش أزمة مياة .. خالص
التعذيب في اقسام الشرطة مسلسل مش عايز ينتهي
احتجاجات و اعتصامات و اضرابات
مصر بتولع يا ناس .. البلد دي رايحة على فين
زي اعلان التلفريك بالظبط
...التلفريك دة رايح فين
الدنيا ناااار
الناس هاتنطق اهي
بس كل ما يقرب لسانهم للكلام و تقرب ايديهم للثورة بتنطفي تاني بسرعة
بس ما علينا الأمل موجووووود