عبط المصري اليوم
بصراحة يا جماعة مش عارفة اقول ايه بس على الخبر اللي اتنشر في المصري اليوم امبارح و اللي بيقول
"معركة قومية بسبب تخلف الصحف القومية"
اللي كتب العنوان دة راجل جامد جدا جدا بجد اللي خلاني اقرأ الخبر فعلا هو العنوان دة وعلى قد ما العنوان عجبني اووي الا ان الخبر مع احترامي الشديد "واقع" بغض النظر عن السبب الذي جعل المصري اليوم تنشره واحترامي الشديد برضو لمجدي سمعان و لقيادات المصري اليوم علشان متقولوش كانت معانا ولما مشيت بدأت تشتم .. ما علينا يعني .. فعلا انا شايفة ان الخبر مهنيا من المفترض لا ينشر على الاطلاق لاني اعتبرته نكاية في صحف منافسة في السوق و مجرد نشر الخبر يعطي القارئ صورة عن العلاقة بين المصري اليوم و الاهرام أو بمعنى اصح طبيعة العلاقة اللي زي الزفت بين أسامة سرايا رئيس تحرير الأهرام استاذ مجدي الجلاد رئيس تحرير مراجيح مولد النبي
دة غير انه فعلا بلاش تحدف الناس بالدبش اذا كان بيتك من زجاج ، يعني المصري اليوم بقالها قرن بتنشر ما اسمته مراجعات فقهية و فكرية للتنظيمات الاسلامية او الارهابية اياً كان اسمها والحمدلله طلع نص اللي اتنشر حصريا على صفحات المصري اليوم الجريدة المحترمة منقول من على احد مواقع الانترنت و هو ما اثبته برنامج الطبعة الاولى الذي يعرض على _دريم 2 الساعة 8:30 يوميا ماعدا الخميس و الجمعة_ الاسبوع المنصرم
الجريدة في نظري بدأت في الانهيار خصوصا بعد الحوار الذي اجراه رئيس تحريرها مع رئيس الجمهورية السنة الماضية و فعلا بدأت في الانهيار الفعلي بسبب عوامل كتيرة جدا ولولا اني فعلا بحب الجورنال دة و هو اساسا اللي اتعلمت فيه صحافة و بدأت فيه و اداني اسم يعتبر كبير نوعا ما مكنتش قلت ان المصري اليوم لازم يخلي باله من تصرفات الصحفيين اللي فيه التي تظهر على الورق و ما خفي كان أعظم ، و في رأيي الجورنال دة عايز راجل
مع احترامي..
