مجرد سؤال : ايه الهبل دة

ماشي يا حكومة

المهزلة اللي بتحصل لصحفيي جريدة البديل لم ولن تحدث في تاريخ نقابة الصحفيين والشخصية الزبالة اللي اسمها مكرم محمد أحمد نقيبهم لن يتكرر مرة أخرى ، صحفيين جريدة البديل معتصمين في النقابة بقالهم 4 ايام ومضربين عن الطعام وعمالين كل يوم يتساقطو من التعب والارهاق واحد تلو الأخر ، دول ناس خدت موقف واشتغلت في جورنال يساري ، حرية وديموقراطية بقى ما أحنا اصلا في أزهى عصور الحرية والبتنجان ، فيه نقيب محترم في الدنيا يقول لو اعتصموا 100سنة مش هايدخلوا النقابة ، هي بتاعة أبوك ؟ ..إلى متى ستظل جداول القيد ولائحة القيد في نقابة الصحفيين مبهدلة اللي جابونا ، ازاي نقعد بالسنين بنكافح في جرايد ويترفع علينا قضايا واحتمال كبير نتسجن

واذا حالفنا الحظ ولم ندخل السجن فأمن الدولة دائما في الانتظار ، وبعد دة كله كمان

النقابة المسئولة عن الدفاع عننا دائما ضد حرية الرأي والتعبير

إلى متى الظلم في بلدنا

سلامة العين .. كله إلا حاسة البصر

ممكن يكون موضوعنا طبي إلى حد كبير بس يا جماعة انا عايزة اتكلم عن مرض قد يكون منتشر خصوصا بين الإناث وكبار السن يصيب العين ولازم ننتبه ليه من الأول ونلاحظ إيه التغيرات اللي بتصيب العين والابصار في كل ساعة من يومنا و مش معنى أنه كتير بيعانوا من المرض يبقى خلاص بقى مش مهم لأنه البصر أو العين هي الجوهرة وهي أهم ما يملك الإنسان ، اللي خلاني اتكلم عن الموضوع دة انه حصلي شوية حاجات في الفترة الأخيرة خليتني اكتئب وازعل وضغطي يعلى جدا ويوطى جدا وطبعا ببكي وبعيط بحرقة وكلام كله مالهوش لازمة يعني المهم في النهاية لاقيت اني مش بشوف بعيني الشمال كويس أو بمعنى أصح ساعات مش بشوف بيها خالص قررت اروح لدكتور عيون

وقال لي الآتي

"الاجهاد الشديد اللي أصاب عيني في الفترة الأخيرة أدى إلى ظهور الذبابة الطائرة أو مبادئ انفصال الشبكية "

أنا طبعا قلتله أهلا وسهلا بيك

وقعدت بقى أسأله وبحثت عالنت ونقلت لكم الكلام دة عشان لازم كلنا نعرف ايه الاخطار اللي ممكن تصيب عيونا من أول قصر النظر إلى أمراض الحساسية والكلام دة كله ويارب اللي يقرأ يكون خايف فعلا على عينه

وعافانا وعافاكم الله ..

أولا: الذبابة الطائرة مصطلح طبي يعبر عن خيالات أجسام يراها المصاب أمام عينه أحيانا كثيرة تكون في شكل خيوط ونقاط سوداء قد تزداد حجما لتغطي كامل العين والعياذ بالله وبصراحة أحسن مصطلح قريته عنها هو : الذبابة الطائرة تلك التي لا يراها أحد سواك ، تكثر رؤية المصاب لها في الأماكن ذات اللون الواحد ، يعني مثلا عن النظر للجدران البيضاء أو ذات لون طلاء فاتح

ثانيا : أكثر من يصاب بهذا النوع من أمراض العيون هم كبار السن ومرضى السكر والضغط وارتفاع التوتر الشرياني وأحيانا يكون السبب نفسي أو بسبب الإجهاد الشديد للعين

ثالثا : المضاعفات التي قد تصيب المريض وهي في أسوأ الحالات تؤدي للعمى الكامل للعين المصابة لأن هذه الخيالات او الخيوط التي يراها هي عبارة عن سوائل تكثفت وتجمعت من الجسم الزجاجي للعين فإذا ما التصقت أو اصطدمت بشبكية العين فإنها تمزقها تماما فيما يعرف بانفصال الشبكية التي يستلزم التدخل الجراحي على الفور لأنه يؤدي لنزيف العين ثم فقدان البصر وقد يكون ذلك في حالات نادرة إلا انها موجودة

ونصيحة خاصة اعتبروها نصيحة مجرب

مفيش حاجة تستاهل البكاء ولا إننا نؤذي نفسنا بالتعب والاجهاد والزعل والكلام دة كله لأن الصحة هي أهم حاجة وياريت يا جماعة نخاف على نفسنا حياتنا كلها ليها قيمة إحنا مش عايشين في الدنيا كدة من غير لازمة واللي ربنا أنعم بيه علينا لازم نحافظ عليه

ربنا لم يخلق لنا العين لكي نبكي عندما نتألم فقط بل خلقها لنا لننظر إلى نعمه الوفيرة

و ربنا يحفظنا جميعا

البديل ... سارة نور الدين

اضغط على الصورة للتكبير

كيف الحال

انا رجعت اشتغل .. تعبت فعلا الايام اللي فاتت ، قاعدة في البيت طول الليل والنهار وعلطول في اوضتي مش بخرج منها تقريبا ، فرص كتير راحت مني وضيعت فترة كان ممكن أكون فيها حد كويس واشتغل في مكان كويس يخليني اكتب اللي نفسي اكتبه بقالي زمن ، أعز الناس اتخلى عني وكتير ناس نسيتني وسط مشاغلها وانشغالها عني وعن الوقوف جمبي في محنتي ، لا أنكر ان دة أثر فية جدا ولو كانت الأدوار اتبدلت وكانوا هم في مكاني مكنتش هابعد عنهم ومكنتش هانساهم مهما كانت مشاغلي

ومش معنى اني مطلبتش حد يقف جمبي يعني خلاص اني قادرة اكمل لوحدي من غير ما يكون فيه حد ياخد بإيدي ويطلعني من اللي كنت فيه ، بس بجد الصديق وقت الضيق

وبجد الفترة اللي فاتت عرفتني ان فيه ناس مكنتش اتخيل انهم يقفوا جمبي وكنت فاكرة اني بالنسبة ليهم مجرد

واحدة يعرفوها وخلاص بس بجد بان معدنهم الأصيل

ما علينا

المهم اني رجعت تاني بقيت كويسة وفعلا اتعلمت كتير الفترة اللي فاتت

فعلا مش هابني أحلام على أشخاص ، أحلامي اللي من زمان حلمت بيها وابتديت احققها

وجزء كبير منها اتحقق

هي الأبقى ، وهي اللي قررت انها تفضل معايا

الحمدلله اني خرجت من وسط الألم دة وبصراحة كان كل يوم بيزيد فيها ، بس الحمدلله خرجت ، صحيح اني تقريبا مش نافعة تاني ومحتاجة عمرة علشان ارجع سارة بتاعة زمان بس خلاص انا المرة دي قررت ارجع ومش محتاجة لحد

بس محتاجة انكم تدعولي اعرف اساعد نفسي

وبجد شكرا لكل اللي وقفوا جمبي واللي اتخلوا عني

مش بعرف ازعل من حد

كل عام وانتم بخير

بمناسبة العيد ولو انها متأخرة حبتين

وبمناسبة ذكرى انتصارات اكتوبر