صفحة جديدة .. بس في نفس الكتاب

تقريبا انا ماليش نفس اكتب حاجة وخلاص مبقاش عندي روح الكتابة بتاعة زمان وفكرت كتير اني اعلن اغلاق المدونة واسيب المجال دة خالص بس مش هاين علية اقفل مقــاومة انتو مش متخيلين انا بحب المدونة دي قد ايه مقدرش اعمل كدة بس في نفس الوقت مش قادرة اكتب وماليش نفس اكتب حاجة فعلا .. تقريبا عشان فيه تطورات في حياتي حلوة و وحشة زي اي حد في الدنيا ممكن اللي كان بيقرأ المدونة زمان حاسس اني علطول مكتئبة واني شايفة الدنيا سودة ومفيش حاجة كويسة في حياتي برضو دة ليه سبب اني خليت المدونة ملجأ أخير بكتب فيه حاجات مضايقاني وقارفاني ومش بكتب فيها اي حاجة حلوة تحصلي... بيمر وقت طويل بين التدوينة والتدوينة اللي بعدها .. مكنتش بكتب فيها كل حاجة .. ويمكن كمان مرت فترة طويلة كنت في الأول بكتب كل حاجة وبصفة مستمرة .. كان ماليني حماس كبير وأمل أكبر .. بس كأي إنسان بيمر بوقت يطلع فيه السما ويقع ويرجع يحلم بس أقل من الأول ويحصله حاجات ويعمل حاجات .. يعني .. عايزة أقول انه اللي خد عني فكرة اني كئيبة من كتاباتي ممكن ميكنش عارفني كويس دة غير انه فيه ناس كمان من اصحابي واخدين عني الفكرة دي .. المشكلة اني بيحصلي الاكتئاب منهم .. مشكلتي تقريبا ان نفسيتي بتتأثر "بالعوامل الخارجية" بسرعة كبير .. حلوة عوامل خارجية دي