ذكريات عام مضى

فاتت 365 يوم اخرى من حياتنا
سنة كاملة انقضت بحلوها ومرها
لا أعرف كيف أبدأ ذكرياتي لكني اعتقد اني سأبدأها من العام قبل الماضي
لا أدري لماذا اجمع بين 2006 و 2007 وأعتبرهما عاماً واحدا
يمكن لان حياتي فعلا بدأت فيهم
سنتان مضت كلما اريد تذكر ايامهما بدأت ذاكرتي بكأس الأمم الأفريقية
وملاعب الاستاد وذكريات أول مرة شفت فيها ميدو "أحمد حسام" وكيف هتفت بأعلى صوتي ضد
حسن شحاتة لما طرده ، وشديت الرحال بعد منتصف الليل إلى الاستاد في اخر ماتش
وهتفت باسم مصـــر لما فازت بالكأس و والله وعملوها الرجالة
بدايتي في الصحافة كانت في 2006 في المصري اليوم
بعد شهر نضال مع قضاة مصــر و الضرب اللي كلناه في المظاهرات
كانت أحلى أيام ، كنت حاسة فيها بأن الثورة قربت و الناس حاسة بيها
على قد ما كان الأمل موجود في الأيام وكانت الدنيا مش سايعانا خوف من الضرب أو الاعتقال وحزن على اللي راحوا وراء القضبان
بس كنت مؤمنة ان الثورة لازم تسيب وراها ضحايا
الله ... الأفكار الحرة دي كان طعمها حلو أوي
على رأي بابا كان دايما يقولي ان القوة والثورة اللي انا عايشة فيها هاتيجي عليها أيام تسكتها و يمكن تخمدها خالص
أمن الدولة وجابر بن حيان كان ليهم هم كمان ذكرى لا يمكن تتنسي و أنسى ايه ليلة في أمن الدولة
لا يمكن طبعا ، وبصراحة اللي لايمكن انساه محفوظ وهو على سريره في العناية المركزة
قبل يوم من وفاته .. وكمان منظر الضابط اللي كان بيحقق معايا
لو كان بيحقق مع ناس كتير زيي يبقى الله يكون في عونه
كدة هانعمل فيلم عن تعذيب الضباط على ايدي المواطنين
ذكريات موضوع أطفال الشوارع اللي عشت فيه مع الولاد دول و اتألمت معاهم و تعبت بسببهم
ذكريات لا يمكن انساها ، على قد ما الموضوع دة شهرني وكان هايوديني في داهية وكنا هانتحبس انا و منى بسببه
على قد ما ساب جوانا ألم كبير قوي على قاع المجتمع المصري
فهمت بجد يعني ايه تمشي في الشارع وانت خايف ، عرفت يعني ايه أشتغل صحافة و يجيلي اكتئاب حاد بعد ما اخلص شغل
حسيت بأي طفل يتولد ميكنش ليه سند في الدنيا وميكنش ليه حد يحتويه ويحميه من المرض والجهل والحياة كلها
صحيح فضلت اتعالج أنا ومنى من اثار الموضوع دة لأكتر من 6 شهور بعديه بس أحلى حاجة كسبتها
مكنتش شهرة ولا علاقات ولا احترام في الوسط الصحفي
أحلى حاجة كانت صديقتي منى الوحيدة اللي قدرت تستحملني و تستحمل صوتي العالي وتقلبات مزاجي اللي كانت بتتغير كل 3 دقايق
...................
شهر مارس 2007 بقى اللي رجعت فيه اشتغل تاني
كان اول موضوع مع أحمد عبدالفتاح
بعد دورة حقوق الإنسان اللي خدناها سوا في مركز القاهرة لدراسات لحقوق الإنسان
كان أيام جميلة جدا واستفدت بيها بشكل غير عادي
وذكريات الصورة اللي خدناها على الكوبري وعربية التعبئة العامة اللي طلعت ورانا علشان تأفشنا
ومعرفتش والصورة اتنشرت في الصفحة الأولى للمصري اليوم
حاجات كتير اوي حصلت بعدها
أهمها اني رجعت اشتغل بشكل ثابت في الجورنال دة
دي كانت أصعب فترة بجد في حياتي
علشان كدة انا مش عايزة افتكرها
بس خلصت 2007 بسرعة وبصراحة أحلى شهور السنة دي كان شهر 10 وبالتحديد أخر اكتوبر
لأسباب خاصة .. أكيد مش من ضمنها الضربة الجوية اللي عبرت بينا القنال
سنة 2007 كانت هادية بالرغم من ان كان فيها التعديلات الدستورية اللي باعتبرها
من اسود ايام مصــر ولن يشهد التاريخ المصري الحديث أسود منها
فيها ايه تاني السنة دي
مفيهاش حاجة
خلصنا