فعلا .. هي فوضى

مدخلتش سينما بمحض ارادتي من ساعة فيلم عمارة يعقوبيان غير كدة دخلت بحكم اني مصاحبة ناس بتحب تدخل سينما ، بس أول مرة ابقى رايحة السينما وانا فعلا عايزة اتفرج على الفيلم اللي معروض ، كنت متلهفة جدا اني اشوف "هي فوضى" لاني كنت عايزة اعرف يوسف شاهين وابنه خالد يوسف عرفوا بجد البلد دي رايحة لفين ولا مجرد فيلم والسلام.. بصراحة أول فيلم اشوفه اشهدله بأنه بجد بيمثل شريحة كبيرة من الشعب المصري ، بأحلامهم وطموحاتهم وحالة الحب اللي عايشين فيها و علاقة الناس ببعضها كانت مرسومة بشكل حلو أووي في رائعة ناصر عبد الرحمن و يوسف شاهين و خالد يوسف.
الفيلم ببساطة غير معتادة عن يوسف شاهين بيرسم لوحة لمصــر محدش عرف يقربلها منذ زمن على الشاشة مش عايزة احرق الفيلم عليكو بس نفسي احكي الفيلم زي ما أنا شفته .. نور اللي هي المفروض مصــر انسانة بسيطة في غاية البراءة بتحب رجل القانون اللي المفروض هو القضاء المصري ، ودائما في منتصف الطريق يظهر حاتم الذي يمثل أقسى وأشد صور الفساد الذي وصلت له الطبقة الحاكمة في مصر ، مصــر بينتهك عرضها على أحد ضفاف النيل بأيدي الفساد ، وبينتهي الفيلم بثورة الشعب.
الفيلم بجد عرف الشعب دة بيفكر ازاي أولا ومن وجهة نظري على رأي المثل لو حد حكمني عليه لاكله باسناني ، قصدي على حاتم طبعا اللي وقع في اخر الفيلم و لما هرب الناس كانت مستنياه لانه بهدلهم وكان فارض عليهم اتاوات وعمل فيهم اللي ما يتعمل ، زي ما الحكومة بتاعتنا بتعمل كدة ، بصراحة انا تخيلته احمد عز .. تخيلوا انتو لو احمد عز وقع مثلا وسط ناس قلعة الكبش اللي اتشردوا ولا وسط الناس اللي الحكومة هدمت عليهم بيوتهم في كل بقاع مصر المحروسة .. يارب اشوف فيك يوم يا احمد يا عز قادر يا كريم..
والحاجة التانية ان الفيلم عرض ثورة الشعب في الاخر بشكل واقعي جدا ، بعد ما الناس اتلمت وقررت انها تهاجم القسم اللي فيه الطاغية حاتم وكسرت كل الابواب وخلاص هاتخترق اهه .. وقفت أم نور - مصــر - علشان تقول احنا جايين نعمل محضر ضد حاتم! .. انا توقعت غير كدة و انا بتفرج ، بس لاقيت انه صح ، الشعب دة مش بتاع ثورات ولا انتقام ، الشعب دة طيب اووووي لدرجة مش كويسة
الحاجة الأخيرة ان الفيلم بيقول ان تحالف مصــر مع القضاء ، اللي هو الحب بين نور و المستشار ، هو اللي هاينصفنا و يقضي على الفساد ويحرر مصــر ، زي ما كنا فاكرين ان الثورة هاتقوم بعد مظاهرات القضاة وهو دة المشهد اللي بدأ بيه الفيلم مشهد مظاهرات تأييد قضاة مصــر و صورة المن المركزي وهو بيعتدي على المتظاهرين و العلق اللي خدناها كلنا لما كنا واقفين بنقول لا للظلم .. كفاية