العيب في مين يا بلد
دة قصة
مستوخاه من قصة برضو
جاية من مكان بعيد
يمكن انت مش شايفه
ويمكن انا شايفاه
او العكس
بس في النهاية
فيه ناس عايشين فيه
تعرف بيفكروا ازاي؟.. ولا تعرف حتى هم عايشين ازاي
بص لنفسك في المراية
ها
لاقيت وشك ولا لاقيت وش حد تاني تعرفه
ايوة ... دة وش حد تاني انت تعرفه كويس
ممكن تكون انت اللي مخليه يقف ادامك
ويبص عليك
وساعات يراقبك
علشان لما الطيب اللي جواك يطلع
يضربلك جرس انذار
ويقولك ارجع
اللي عايشين في المكان دة بقى
مالهمش دعوة بينا
ممكن يشبهونا في الشكل و في الهيئة
انما لما تبصلهم مش هاتعرف انهم شبهنا
وممكن تتريقأ عليهم كمان و تقول انهم عبط
تعرف
احنا تعبانين اوي
وبنحب نتعب نفسنا اكتر و اكتر
بنحب نلبس وشوش
لكل مناسبة عندنا.. وشوش
نقعد نلونها ونغيرها وساعات نعقدها اكتر و اكتر
في الاخر بنتعب
بنتعب اوي
وبنقول بلاش نقعد في المكان إياه
ونسيبه ونمشي
اصل المكان دة شاف كل وشوشنا
مبقاش عندنا حاجة جديدة نوريهاله
مبقاش عندنا حاجة ندافع بيها عن نفسنا
ونسيبه ونمشي تاني وتالت
وساعات اللي بيسيبه و يمشي مش بيرجعله الا بعد ما يتنسي
المكان دة غريب اوي بجد
فيه كل حاجة
فيه الطيب و العبيط والاهبل و الراجل المحترم و اللي بيستعبط
فيه الجميل و الرقيق و اللي بيتكسر وفيه اللي قلبه جامد وبيكسر
فيه اللي بيتفنن بفنه وفيه اللي بيتفنن بنهبه
فيه كل الألوان .. تمشي في المكان تلاقي الاصفر اصفر
وتلاقي الاخضر اخضر وتلاقي الأبيض أبيض وشفاف
ومكان ما بنوصله بادينا كل دة بيتلخبط
ياترى العيب في مين يا بلد
في الارض ولا في الايد
No comments:
Post a Comment