الذكرى رقم 6

مش عارفة لو كان الكلام اللي هاكتبه ليه لازمة ولا لأ ، بس النهاردة الذكرى رقم 6 لاخر معركة كانت بيني و بين السرطان ، أنا فرحانة جدا أني لسة عايشة على الرغم من اني بعيط لما بفتكر إلا أني بجد اتعلمت من التجربة دي حاجات عمر ماحد يتخيل اني هاتعلمها ، انا بجد اللي شفته مع المرض دة آلام شديدة جدا يارب محدش يشوفها في الدنيا حتى لو كان مين، دي حاجة نادرة من الحاجات في حياتي اللي فاكرة تفاصيلها كويس جدا مش عايزة اقولها لأنه الحمد لله عدت و لكن اللي اقدر اقوله انهم كانوا حوالي 3 شهور من العذاب المتواصل في المستشفى بعيد عن أمي ، و كمان و صدقوني الموت كان أهون إلا إن ربنا رحمن رحيم والحمد لله انه موجود ، علشان كدة انا مستعدة اعمل اي حاجة في الدنيا علشان مستشفى سرطان الأطفال دي تتبني و يبدأ الشغل فيها علطول العيال دي عايزة تتعالج و ربنا ينتقم من اللي كان السبب يا يوسف يا والي يابن ... ، حسبي الله و نعم الوكيل كل آلام الأطفال و الناس المصابة بالمرض دة في رقبة المسئولين و أولهم مبارك الكلب و حسبي الله و نعم الوكيل تاني و يمكن ربنا احياني لحاجة ممكن اقدر اعملها و غيري لأ ..يمكن! عارفة اني تسببت بألم لماما و بابا و كل اللي حوالية إلا انها كانت بجد ذكرى مميزة من الذكريات اللي في حياتي و اسفة لو كنت تعبتكم في قرايتها بس كان لازم أدونها علشان بقالي 6 سنين عايشة و مش عارفة اكتب حاجة فيها لحد دلوقتي.