كفاية بقى يا اخوانة بتهرج بتلعب حاجة كدة يعني

أولا لا تنظيم لم يكن هناك أدني نوع من التنظيم للمظاهرة لذا قمعت من البداية و تم فضها بمنتهى السهولة في ميدان التحرير ، توجه المتظاهرين بعدها للنقابة و وجدوا أن المظاهرة تحت حزب التجمع "توتو" و وقفوا و تضامنوا مع بعضهم ، فوجئوا باخباريات و اشاعات الاعتقالات في صفوف القادمين إلى ميدان طلعت حرب لم يكن هنالك أي نوع من الاتصالات سوى الاعتماد على هواتف النعتقلين التي كانت لاتزال بحوزتهم في عربة الترحيلات ، وقفنا وجدنا أن العدد مهين بكل معنى الكلمة هتقولوا الناس خايفة ، ماشي خايفين بس اللي يحضر يكونوا بالكثير أوي 50 واحد الحكاية دي صعبة شوية في ظل ان القيادات بتقول للحكومة لا ، اعضاءنا 14 ألف واحد مصري مش موزمبيقي ، ماعلينا ، في الهتاف حتى غير محترمين و لم يكن لدينا تنظيم يحترم ، ليه الشتيمة في الأحزاب ماشي ياعم الأحزاب حالتها ميئوس منها بس مينفعش بحال من الأحوال انك بتنادي لوحدة المعارضة تخلينا نشتم في بعض ، و نهتف ضد بعض ، مينفعش ، كل واحد بقى عايز يعمل ريس على التاني برضو مينفعش ، التجمع بقى قام بالواجب و زيادة بصراحة ، أضاء لنا النور و فتح الكهرباء عشان كنا خلاص ممكن نضرب في بعض بدل ما نوجه ضرباتنا للأمن ، كويس ، كل قياداته فوق على المنصة أقصد الزفت البلكونة ، ضياء الدين داوود كان فوق في التجمع برضو قاعد بيصبر و يصابر لحد ما المعتصمين يغوروا عشان يعرف يروح ، الغد الناحية التانية بيهتف و بقوة ، اتحاوطوا و دخلوا في كردون تاني و ايه راحوا الدراسة الحمد لله ، فين التنظيم فين الاحترام ، المظاهرة دي كانت عبارة عن مهزلة بكل معنى الكلمة ، هي دي المظاهرة اللي المفروض هنعترض بيها على تفصيل الدستور ، على ترزية القوانين ، لا بجد ... من حقه يسرح و يمرح فيها زي ماهو عايز .. ماهو يا فرعون ايه فرعنك .. قالك مالقيتش اللي يلمني و عنده حق ، و انا حرمت انزل مظاهرات تاني و هانتبه في شغلي أكيد هاعرف اعترض فيه باحترام و هيأثر أكثر من لعب العيال دة.. و اسفة لو كنت باجي على حد أو اظلمه على الرغم من دة كله أكيد الحكاية فيها ناس محترمة بس مش لاقية نفسها و انا أؤمن بان التغيير لن يأتي باتباع طريق أو مشلك واحد و نما ببذل الجهد في كل الطرق و الاتجاهات .. واللي عنده حاجة للبلد دي يعملها ..